The New Indian Express skýrir frá þessu og hefur eftir dómara í Ballari að málið hafi komið fyrir dóm þar. „Maðurinn sagði að eiginkona hans kynni ekki að elda neitt annað en Magginúðlur. Hann fékk núðlur í morgunmat, hádegismat og kvöldmat. Hann kvartaði yfir að eiginkonan hafi farið að versla og alltaf komið heim með skyndinúðlur,“ sagði dómarinn um málið sem hann nefnir „Maggimálið“.
Maðurinn fékk skilnað.
Dómarinn sagði einnig frá öðrum „öðruvísi“ skilnaðarmálum. Til dæmis hafi hann fengið umsókn um skilnað daginn eftir brúðkaupið. Eitt mál snerist um að litur brúðarkjólsins þótti ekki vera réttur og annað snerist um að eiginkonunni fannst eiginmaðurinn ekki bjóða henni nægilega oft út að borða.
Hann sagði að umsóknir um skilnað komi bæði frá fólki sem hafi gifst af ást og fólki sem hafi gifst einhverjum sem foreldrar þeirra völdu. Fleiri umsóknir komi frá fólki í þéttbýli en dreifbýli. Á landsbyggðinni grípi þorpshöfðingjarnir inn í og „lagfæri“ hjónaböndin. Þar njóti konurnar ekki sjálfstæðis og vegna þess hversu hræddar þær eru við að særa tilfinningar fjölskyldunnar og samfélagsins láti þær það yfir sig ganga að vera áfram í hjónabandi. Í þéttbýli séu konurnar menntaðar og fjárhagslega sjálfstæðar og standi á sínu.
