Jafnvel óttast að um krabbamein sé að ræða
Abel Dhaira, markvörður Pepsi-deildar liðs ÍBV í knattspyrnu, glímir við alvarleg veikindi og er jafnvel óttast að um krabbamein sé að ræða. Þetta kemur fram í Morgunblaðinu í dag.
Þessi 28 ára Úgandamaður hefur leikið með ÍBV frá árinu 2011, en hann á tæpa 60 leiki að baki í efstu deild fyrir félagið.
„Abel er veikur, það er engin launung á því. Við ákváðum því að taka hann til Íslands og hann er undir læknishöndum og í rannsóknum,“ segir Bjarni Jóhannsson, þjálfari ÍBV, í samtali við Morgunblaðið. „Meira vitum við ekki í bili. Við bíðum eftir niðurstöðum úr þessum rannsóknum,“ segir hann.
Þegar hann var spurður hvort um krabbamein væri að ræða sagði Bjarni að það sé ekki vitað. „Þetta er kornungur maður og maður vill ekki trúa því. Því miður höfum við ekki fengið nægilega miklar upplýsingar frá Úganda. Það er ekkert samræmi í einu né neinu og við vitum því lítið um hvað hefur gerst. En veikindin eru þess eðlis að við ákváðum að taka hann til landsins, til að vonandi hjálpa honum. Maður veit svo sem ekki hvort heilbrigðiskerfið er betra hérna en í Úganda, en við stóluðum á að það væri heldur skárra hér,“ sagði Bjarni.
Litlar líkur eru því á að Abel verði með ÍBV-liðinu næstu vikurnar og segir Bjarni að til skoðunar sé að fá nýjan markvörð til félagsins.