Meðfylgjandi myndir tók Kristján Söebeck Kristjánsson á göngu sinni um Elliðaárdalinn en myndirnar eru teknar ofarlega í dalnum. Þær sýna glögglega að fólk hefur hreiðað um sig í dalnum og gert sér næturstað.

„Mér þykir nöturlegt að fólk búi þarna,“ segir Kristján í samtali við DV. „Þetta er bara annað hreiðrið þarna, ég er líka með myndir sem eru teknar neðarlega í dalnum, þar er miklu verri umgengni, meðal annars eru þar rafgeymar. Mér þykir í sjálfu sér ekki lýti að þessu hreiðri þarna því fólkið hefur gengið vel um,“ segir Kristján.

Erfitt húsnæðisástand er í borginni, framboðsskortur og hátt leiguverð. Eflaust á það sinn þátt í að sumir hafa ekki í nein hús að venda.

Kristján segir að yfirleitt verði ekki vart mannaferða við þessi hreiður útigangsfólks nema seint á kvöldin. „Það er ágæt umgengni þarna en í hreiðrinu fyrir neðan eru rafgeymar og drasl og eins og þar hafi verið neysla,“ segir Kristján.

Hér fyrir neðan eru myndir frá útigangshreiðrinu sem finna má má neðst í Elliðaárdalnum. Þar segist Kristján telja öruggt að neysla vímuefna sé stunduð:

.