Páll Magnússon, fyrrverandi þingmaður Sjálfstæðisflokksins, hefur þegið boð bæjarmálafélagsins „Fyrir Heimaey“ í Vestmannaeyjum um að skipa efsta sæti á lista framboðsins fyrir bæjar- og sveitarstjórnarkosningarnar í vor. Páll etur því kappi við sinn gamla flokk, Sjálfstæðisflokkinn, í kosningunum.

Páll greinir frá þessu í færslu á Facebook þar sem hann hrósar núverandi bæjarstjórnarmeirihluta Vestmannaeyingar fyrir frammistöðuna á kjörtímabilinu sem er að líða. Yfirlýsingin er eftirfarandi:

Kæru vinir og kunningjar!

Ég hef fallist á ósk bæjarmálafélagsins Fyrir Heimaey um að skipa fyrsta sætið á framboðslista þess í bæjarstjórnarkosningunum í næsta mánuði. Kjörnefnd félagsins og Íris Róbertsdóttir, bæjarstjóri, voru sammála um að best færi á því að oddviti listans og bæjarstjóraefnið væri ekki einn og sami einstaklingurinn og því er þessi háttur hafður á.

Hvað mig varðar er ég þakklátur og stoltur af því að vera treyst fyrir þessu verkefni og mun leggja mig allan fram um að gera góðan bæ enn betri. Reynsla mín og þekking úr stjórnmálunum mun væntanlega ekki síst nýtast í samskiptum og hagsmunagæslu bæjarins gagnvart ríkisvaldinu. Auk þess hef ég langa reynslu af rekstri stórra fjölmiðlafyrirtækja – bæði í einkageiranum og hinum opinbera.

Sem Eyjamaður og fyrsti þingmaður Suðurkjördæmis í fimm ár hef ég fylgst býsna grannt með góðri frammistöðu bæjarstjórnarmeirihlutans á því kjörtímabili sem nú er að líða. Árangurinn hefur verið aðdáunarverður – ekki síst þegar höfð eru í huga utanaðkomandi áföll á borð við loðnubrest tvö ár í röð og covid-faraldur. Ég vil gjarnan stuðla að því að þetta góða starf haldi áfram undir öruggri forystu bæjarstjórans.

En er ég þá hættur að vera sjálfstæðismaður? Svarið við þeirri spurningu er nei. Ég styð Sjálfstæðisflokkinn áfram á landsvísu þótt sjálfstæðismönnum í Vestmannaeyjum hafi ekki borið gæfa til að laga þann klofning sem hér varð 2018. Vonandi kemur að því fyrr en síðar.

Allt fyrir betri Eyjar – ást og friður!