Finnur Birgisson, fyrrverandi skipulagsfulltrúi Mosfellsbæjar, segir fjandsamlega yfirtöku hugsanlega yfirvofandi í Félagi eldri borgara. Stjórnarkjör er framundan á aðalfundi næstkomandi þriðjudag og hefur Þorkell Sigurlaugsson, sem þekktur er úr atvinnulífinu, boðið sig fram til formanns. Þorkell býður sig einnig fram í 2. sæti á framboðslista Sjálfstæðisflokksins til borgarstjórnarkosninganna í vor.

Núverandi formaður er Ingibjörg H. Sverrisdóttir og sækist hún eftir endurkjöri. Finni hugnast ekki mótframboð Þorkels og ekki heldur framboð þriggja nýrra manna í stjórn. Telur hann að þarna séu menn sem ekkert hafa unnið að málefnum eldri borgara að seilast til áhrifa:

„Framan af leit út fyrir að Ingibjörg yrði ein í framboði til formanns. En um síðustu helgi, rétt áður en lokaframboðsfrestur rann út, barst hinsvegar tilkynning frá Þorkeli Sigurlaugssyni viðskiptafræðingi um framboð hans til formanns. Fljótlega eftir það fór svo að fréttast að komin væri í gang áróðursherferð, þar sem fólk er í tölvupósti hvatt til að kjósa Þorkel og auk hans þrjá nafngreinda karla úr hópi frambjóðenda, – einmitt þá sem eru nýir á listanum og sitja ekki í núverandi stjórn. Það leynir sér því ekki að markmið hópsins er að yfirtaka Félag eldri borgara.

Sérstaka athygli vekur í þessu samhengi sú staðreynd að Þorkell er inngróinn Sjálfstæðisflokksmaður sem sækist m.a. þessa dagana eftir öðru sæti á D-lista til borgarstjórnar. Með formannsframboðinu er hann því að freista þess að velta flokkssystur sinni úr sessi, því Ingibjörg er líka nátengd Sjálfstæðisflokknum. Stuðningur við hana einskorðast þó ekki við sjálfstæðismenn, því hún hefur áunnið sér virðingu og traust allra flokka fólks fyrir einarða baráttu sína fyrir málstað eldri borgara.“

Finnur telur að framboðin séu runnin undan rifjum hagsmunaaðila sem vilji sölsa undir sig ferðaþjónustustarfsemi Félags eldri borgara:

„Óhjákvæmilega er spurt hvernig standi á þessari aðför að formanni og stjórn FEB. Óljóst er hvað nýja „formannsefninu“ og liði hans gengur til, því enginn þeirra hefur hingað til látið til sín taka í starfi félagsins. Ekkert virðist heldur benda til þess að aðgerðin sé runnin undan rótum forystu Sjálfstæðisflokksins. Sterkar vísbendingar eru hinsvegar um að aðförin sé að undirlagi tiltekinna hagsmunaaðila í því skyni að sölsa undir sig ferðaþáttinn í starfsemi FEB, en félagið hefur jafnan staðið fyrir fjölda hópferða eldri borgara bæði innanlands og erlendis.“

Pistilinn í heild má lesa með því að smella á tengilinn hér fyrir neðan.