Norski olíusjóðurinn, öðru nafni eftirlaunasjóðurinn, er engin smásmíði en hann nota Norðmenn til að fjárfesta olíuauð sínum til að búa sig undir framtíðina þegar olían verður á þrotum eða vinnslu hennar hefur verið hætt. Nú ætlar sjóðurinn að draga sig alfarið frá Rússlandi og losa sig við allar fjárfestingar sínar þar.

Jonas Gahr Støre, forsætisráðherra, tilkynnti þetta á fréttamannafundi í gærkvöldi. Sjóðurinn á hlutabréf í 47 rússneskum fyrirtækjum auk rússneskra ríkisskuldabréfa. Heildarverðmæti þessara eigna var 25 milljarðar norskra króna í árslok 2021.

Trygve Slagsvold Vedum, fjármálaráðherra, sagði að markmiðið væri að olíusjóðurinn dragi sig algjörlega út af rússneska markaðnum.

Á fundinum var einnig tilkynnt að Norðmenn muni verja allt að tveimur milljörðum norskra króna til mannúðaraðstoðar í Úkraínu.