Jóhannes Karl Guðjónsson var ráðinn aðstoðarlandsliðsþjálfari karlamegin á dögunum. Ráðningin var til umræðu í þættinum Íþróttavikan með Benna Bó á Hringbraut á föstudag.

Jói Kalli, eins og hann er gjarnan kallaður, tekur við starfinu af Eið Smára Guðjohnsen sem gegndi því þar til í nóvember á síðasta ári.

Jói Kalli hættir sem þjálfari karlaliðs ÍA til að taka við starfi aðstoðarlandsliðsþjálfara.

,,Þetta verður áhugavert samstarf,“ sagði Hörður Snævar Jónsson í þættinum. ,,Jói Kalli með ÍA hefur kannski meira verið langur, leið 1. En Arnar Þór er að reyna að spila einhvern fótbolta með íslenska landsliðið.“

,,Ég veit það ekki alveg. Þetta er svolítið óvænt. Maður tengir Jóa Kalla mikið við Skagann,“ sagði Kjartan Henry Finnbogason sem einnig var í þættinum á föstudag.

KSÍ setti sig í samband við ÍA rúmri viku fyrir ráðninguna. Virkjaði sambandið klásúlu í samningi Jóa Kalla upp á Skaga. Hörður setti spurningamerki við tímasetninguna á ráðningunni. ,,Þetta er að gerast í janúar. Það er svo stutt í mót. Skagamenn eru núna með svolítið þröngan stakk. Það er þröngur kassi sem þeir geta leitað í að einhverjum þjálfara sem þeir eru að pæla í. Ég talaði við formann ÍA sem sagði að hann hefði viljað sjá þetta gerast í nóvember þegar Eiður hætti.“

Kjartan telur að þráttt fyrir að Arnar og Jói Kalli séu ólíkir þjálfarar muni sá fyrrnefndi halda í sinn leikstíl. ,,Það er eitthvað sem segir mér að Arnar muni halda fast í sitt leikkerfi og reyna að gera eitthvað úr þessum ungu og efnilegu leikmönnum sem við eigum.“

Hér fyrir neðan má sjá þáttinn í heild sinni.