Stjörnur enska boltans eru farnar að ráða til sínn fyrrum hermenn til að passa heimili þeirra og fjölskyldur. Innbrotafaraldur er í gangi á Bretlandseyjum þessa dagana.

Sérstaklega slæm atvik hafa átt sér stað í Norðvestur Englandi þar sem stjörnur Manchester liðanna og Liverpool búa.

Þannig var brotist inn á heimili Joao Cancelo hjá Manchester City í desember og ráðist á hann og fjölskyldu hans.

Í síðustu viku var brotist inn á heimili Victor Lindelöf hjá United en þar var eiginkona hans og tvö ung börn heima. Þeim tókst að fela sig á meðan þjófarnir létu greipar sópa.

Þetta hefur orðið til þess að leikmenn leita nú til fyrrum hermanna að passa heimili þeirra en einnig er fjöldi leikmanna með þjálfaða hunda sem passa heimilin.

Félögin á Englandi eru farin að hjálpast að í þessum málum og bera saman bækur sínar í því hvað virkar best til að passa heimili leikmanna.