Willum Þór Þórsson, heilbrigðisráðherra, hefur breytt reglum um sóttkví. Um er að ræða mikla rýmkun á reglunum hvað varðar einstaklinga sem eru þríbólusettir eða þá sem hafa fengið COVID og eru tvíbólusettir.

Í nýju reglunum felst að þeir sem falla undir áðurnefnda hópa mega mæta til vinnu eða í skóla. Þeir mega jafnframt sækja sér nauðsynlega þjónustu á borð við heilbrigðisþjónustu, fara í matvöruverslanir og lyfjabúðir og nota almenningssamgöngur.

Þeim er þó óheimilt að fara á mannamót þar sem fleiri en 20 manns kona saman og er skylt að nota grímur í umgengni við alla nema þá sem teljast í nánum tengslum. Gildir þetta jafnvel þó hægt sé að halda tveggja metra regluna.

Þeim er óheimilt að heimsækja heilbrigðisstofnanir, þar með talið hjúkrunarheimili, nema með sérstöku leyfi og er skylt að forðast einstaklinga sem eru í aukinni hættu á alvarlegum veikindum vegna COVID.

Reglurnar hafa þegar tekið gildi. Sóttkví líkur eftir sem áður með neikvæðu PCR-prófi á fimmta degi sóttkvíar.

Í tilkynningu á vef Stjórnarráðsins er haft eftir Willum að þessar breyttu reglur séu til að hægt sé að halda samfélaginu gangandi.

 „Við þurfum að halda samfélaginu gangandi eins og framast er kostur, hvort sem við horfum til skólanna, velferðarþjónustu eða margvíslegrar atvinnustarfsemi og eins og staðan er núna eru þetta bráðnauðsynleg viðbrögð“