Líkt og DV greindi frá fyrr í dag sagði Margrét Friðriksdóttir farir sínar ekki sléttar eftir heimsókn í H&M í Kringlunni. Lýsti Margrét því er henni var kastað þaðan út af her öryggisvarða á vegum Securitas vegna þess að hún var ekki með grímu á sér.

„Þeir fara og tala við kassa­dömurnar að skipta sér af þeirra verslun, þær voru ekkert að setja neitt út á þetta, vegna þess að ég hef alveg oft farið þarna inn áður ekki með grímu,“ var haft eftir Margréti sem segir hana og 15 ára dóttur hennar hafa orðið skelkaðar þegar öryggisverðirnir umluktu þær í versluninni.

Margrét benti öryggisvörðunum á það að grímuskyldan eigi aðeins við á þeim stöðum þar sem ekki sé hægt að tryggja að einn metri sé á milli einstaklinga. Að sögn Margrétar var hún stödd í Kringlunni seint að kvöldi til og að fátt hafi verið um fólk á þeim tíma.

Nú síðdegis hafði Margrét samband við DV og sagði að sættir hefði náðst milli hennar og H&M. Sagði hún að H&M hefði beðist afsökunar á uppákomunni og að fyrirtækið hefði svarið framgang öryggisvarðanna af sér, enda starfsmenn Kringlunnar en ekki H&M. Í samtalinu við DV segir Margrét að hún hefði þegið afsökunarbeiðni H&M, en að hún geti ekki sætt sig við hegðun Securitas varðanna.

„Þetta verður kært,“ segir Margrét, „enda voru þeir þarna að áreita fólk og börn.“