Lögreglan hefur gefið út ákæru á á hendur manni á fertugsaldri fyrir ýmis nytjastuldar- og fíkniefnabrot. Maðurinn er ekki skráður með lögheimili og því hefur ekki tekist að birta honum ákæruna. Þar af leiðandi er hún birt í heild sinni í Lögbirtingablaðinu.
Manninum er meðal annars gefið að sök að hafa stolið bifreið í eigu bílaleigu þann 29. júní í fyrra og nota hana í heimildarleysi í rúma viku allt þar til að hann klessti á kyrrstæða bifreið við fjölbýlishús í Breiðholti.
Maðurinn lagði þá aftur í stæði við fjölbýlishúsið en var skömmu síðar handtekinn af lögreglu. Þá kom í ljós að hann var undir áhrifum margskonar vímuefna, meðal annars amfetamíns, kókaíns og kannabis.
Þá er maðurinn ákærður fyrir reiðhjólastuld úr fjölbýlishúsi í Kópavogi auk þess sem hann var í þremur tilvikum handtekinn með neyslu- og söluskammta af ýmiskonar fíkniefnum. Í eitt skipti var maðurinn handtekinn af lögreglu í smáhýsi við Gufunesveg með söluskammta af amfetamíni og 63 stykki af læknalyfinu rivotril.