„Það er ógn við lífsgæðum fólks þegar gengið er með þessum hætti á starfsorkuna. Þegar teknar eru margar aukavaktir vegna manneklu, þegar skrefateljarinn sýnir að þú gengur að minnsta kosti 8 til 10 kílómetra á vakt, og þegar þú finnur að enginn tími gafst til að nærast, þá hlýtur það á endanum að bjóða hættunni heim. Í slíku starfsumhverfi verða meiri líkur en minni að starfsfólk geri mistök,“ segir í grein sem birtist á Vísir.is í morgun og 25 sjúkraliðar á Bráðamóttökunn í Fossvogi setja nöfn sín undir.

Sjúkraliðarnir segja ástandið á Bráðamóttökunni vera hættulegt vegna ofálags á sjúkraliðum og skora á stjórnvöld að svara ákalli heilbrigðisstétta um að breyta ástandinu í heilbrigðiskerfinu. Þeim fellur þungt að geta ekki sinnt sjúklingum af þeirri fagmennsku og kostgæfni og þeir vilja hafa getu og menntun til:

„Við sjúkraliðar sinnum störfum okkar af alúð og búum að faglegri færni og þekkingu til að til að veita skjólstæðingum Bráðamóttökunnar góða og faglega þjónustu. Hins vegar þegar álagið er eins og hér er líst verður verklagið annað. Starfsumhverfið stuðlar þá ekki að því að sjúkraliði geti boðið upp á þá faglegu hjúkrunarþjónustu sem skjólstæðingurinn á rétt á samkvæmt lögum og þarfnast þegar hann stendur frammi fyrir áskorunum á erfiðustu tímum lífs síns. Þessar aðstæður sem okkur eru skapaðar á Bráðamóttökunni geta bæði haft alvarlegar afleiðingar fyrir skjólstæðinga og okkur sem vinnum í þessu umhverfi.“

Sjúkraliðarnir segja það vonda tilfinningu að komast ekki yfir þau verkefni sem þeir þurfa að sinna á hverri vakt, en það sé engu að síður veruleikinn.

Greinina má lesa hér.