Landsréttur þyngdi í dag dóm yfir manni sem sakfelldur var fyrir hrottalegt ofbeldi gegn fyrrverandi sambýliskonu sinni. Hlaut maðurinn þriggja mánaða fangelsi í héraðsdómi en Landsréttur taldi átta mánaða dóm eiga betur við.

Mun maðurinn hafa ráðist af miklu afli á konuna og meðal annars sparkað af nokkru afli í brjóstkassa hennar. Hlaut konan af árás mannsins meðal annars bringubrot, opin sár á hné og áverka á fingur.

Meðal þess sem kom til álita þegar refsingin var ákvörðuð var langur tími sem liðinn var frá árásinni og að dómi, en hún átti sér stað fyrir fjórum árum.

Í dómnum segir að ástarsambandi fólksins væri svo til lokið og að maðurinn hefði sýnt af sér mikla afbrýðissemi. Þannig lýsti konan því fyrir dómi að maðurinn hefði ítrekað ásakað hana um að hafa átt vingott við aðra karlmenn, og að hún mætti ekki segja „hæ“ við menn úti á götu án þess að þurfa að sitja undir slíkum ásökunum.

Kvöldið sem árásin átti sér stað hafi þeirra samskipti einmitt hafist á þeim nótum. Konan hafði verið úti að skemmta sér þegar maðurinn hóf að ásakana hana um að sýna karlmanni sem var staddur með henni í vinnustaðateiti áhuga. Þegar heim var komið þetta kvöld fór maðurinn að beita konuna ofbeldi, með fyrrgreindum afleiðingum.

Til viðbótar við skilorðsbundinn fangelsisdóm þarf maðurinn að greiða henni 900 þúsund krónur í bætur auk sakar- og áfrýjunarkostnaðar, málsvarnarlaun lögmanns síns og þóknun réttargæslumanns konunnar. Samtals um 2,5 milljónir.