Chelsea tók á móti Norwich í fyrsta leik dagsins í ensku úrvalsdeildinni. Leiknum lauk með 7-0 stórsigri Chelsea.
Chelsea var með öll völd á vellinum frá byrjun leiks en Mason Mount kom liðinu yfir strax á 8. mínútu með glæsilegu skoti rétt fyrir utan teig. Hudson-Odoi tvöfaldaði forystu heimamanna tíu mínútum síðar eftir frábæra sendingu frá Kovacic. Reece James skoraði þriðja markið undir lok fyrri hálfleiks með góðri vippu.
Yfirburðirnir héldu áfram í seinni hálfleik en leikmenn Norwich sáu aldrei til sólar. Ben Chilwell skoraði fjórða markið á 57. mínútu með flottu skoti í fjærhornið og Aarons varð fyrir því óláni að skora sjálfsmark stuttu síðar. Enn héldu hörmungar gestanna áfram en Ben Gibson fékk að líta seinna gula spjaldið og þar með rautt um miðjan seinni hálfleik eftir ljóta tæklingu á Reece James.
Undir lok leiks fékk Chelsea vítaspyrnu sem Mason Mount lét verja frá sér, Krul steig þó af línunni og var spyrnan endurtekin og þá skoraði Mount. Mount var ekki hættur en hann skoraði sjöunda mark Chelsea undir lok leiks eftir sendingu Loftus-Cheek. 7-0 stórsigur Chelsea því staðreynd og Chelsea á toppnum í deildinni.
Chelsea 7 – 0 Norwich
1-0 M. Mount (´8)
2-0 C. Hudson-Odoi (´18)
3-0 R. James (´42)
4-0 B. Chilwell (´57)
5-0 M. Aarons,sjálfsmark (´62)
6-0 M. Mount (´85)
7-0 M. Mount (90+1)
B. Gibson, rautt spjald