Nú hefur lögreglan fundið muni í eigu Brian og nærri þeim fundust líkamsleifar. Lögregluna grunar að Brian hafi átt þátt í dauða Gabby en hann vildi ekkert segja um hvað hefði orðið um Gabby þegar hann sneri einn heim til Flórída úr ferðalagi þeirra þvert yfir Bandaríkin.
Um miðjan september lét hann sig hverfa frá heimili foreldra sinna og hefur hans verið leitað síðan. Mörg þúsund manns hafa tekið þátt í leitinni.
NBC News segir að lögreglan hafi fundið líkamsleifar og muni í eigu Brian á náttúruverndarsvæði í Flórída. Ekki er enn búið að bera kennsl á líkamsleifarnar.
Verndarsvæðið er skammt frá heimili foreldra hans.
Lík Gabby fannst 19. september og krufning leiddi í ljós að hún hafði verið kyrkt.
