Maðurinn sem leitað hefur verið að eftir að hann féll af sæþotu í Kalmarssundi, undan strönd Borgholm á Öland í Svíþjóð, þann 25. september heitir Rósinkrans Már Konráðsson.
Vegna þess hversu langt er um liðið er fjölskylda og vinir orðnir úrkula vonar.
Rósinkrans hefur búið og starfað í Svíþjóð, ásamt unnustu sinni og þremur sonum.
Már Valþórsson, æskuvinur Rósinkrans, saknar vinar síns mikið. „Við vorum góðir vinir og bjuggum tímabundið hjá þeim í Svíþjóð. Við höfum þekkst í 33 ár og gerðum allt fyrir hvor annan,“ segir Már.
Hann segir litla aðstoð að hafa hjá sænskum yfirvöldum. Helst hafi það verið samtökin Missing people sem hafa verið vinum og ættingjum innan handar.
DV ræddi á miðvikudag við frænda Rósinkrans, Víði Víðisson, sem hafði tekið þátt í leitinni í tvo daga ásamt kafara og hópi leitarfólks. „Við erum í kringum 15 manns, bara ættingjar og vinir,“ sagði Víðir þá en leitarskilyrði voru ekki mjög hagstæð. „Það er frekar hvasst núna og erfiðar aðstæður úti á sjó.“
„Við erum bara gamlir sjósleðamenn og krossarar sem fóru út á Jet-skiin sín og erum að þræða svæðið í leita að okkar týnda félaga,“ sagði Víðir ennfremur.