Emma Sayle vill breyta staðalímyndunum um kynlífspartý en hún stofnaði fyrirtækið Killing Kittens árið 2005 til að gera einmitt það. Emma, sem er framkvæmdastjóri fyrirtækisins, opnaði sig nýverið í viðtali við MyLondon þar sem hún ræddi um vinsældir fyrirtækisins og hvernig kynlífspartýin þeirra eru öðruvísi en önnur.

Emma segir að markmiðið með Killing Kittens hafi verið að setja konur og þeirra ánægju í fyrsta sæti. Einungis konur geta sótt um að vera meðlimir til að mæta í kynlífspartýin, karlmenn þurfa að fá boð frá þeim til að mega mæta. Þá mega bara konurnar hefja samtöl og allar ákvarðanir um hvort snerting eða kynlíf sé á borðinu þurfa að koma fyrst frá konunum.

Fyrirtækið heldur reglulega kynlífspartý í London og Manchester á Englandi og í Los Angeles í Bandaríkjunum. Yfirleitt er uppselt í öll partýin mörgum vikum áður en þau eru haldin.

Emma útskýrir í viðtalinu hvers vegna þessi partý eru svona vinsæl. „Killing Kittens er eitthvað öðruvísi, þetta er ekki karllægt umhverfi, konur eru í aðalhlutverki og öruggt svæði þar sem karlmenn eru einnig,“ segir Emma.

„Frá upphafi hefur þetta snúist um að búa til öruggt svæði fyrir konur til að vera við stjórnvöllinn,“ segir hún þegar umræðan berst að því hvers vegna einhleypir karlmenn megi ekki mæta einir í partýin þeirra. „Einhleypir karlmenn breyta stemningunni. Við erum að reyna að færa okkur frá samfélaginu þar sem karlmennirnir stjórna og konur skammast sín.“

Einhleypir karlmenn þurfa þó ekki að örvænta því þeir geta mætt í partýin ef þau fá boð frá konu sem er meðlimur í Killing Kittens samfélaginu.