Nóg var að gera hjá lögreglunni á höfuðborgarsvæðinu í gærkvöldi og í nótt og voru alls 104 mál skráð frá því klukkan 19:00 og þar til klukkan 05:00 í nótt og líkt og algeng er um helgar kom áfengisneysla mikið við sögu. Alls fengu þrettán einstaklingar að dúsa í fangageymslu lögreglu í nótt. Þetta kemur fram í dagbók lögreglu.
Til vandræða í annarlegu ástandi
Nokkuð var tilkynningar til lögrelgu vegna einstaklinga sem voru til vandræða í annarlegu ástandi.
Einstaklingur í annarlegu ástandi gekk um miðbæinn í gærkvöldi með hníf í hendi. Tók það lögreglu skamma stund að hafa upp á viðkomandi sem kvaðst ekki hafa ætlað sér neitt með hnífinn og var honum sleppt eftir að lögregla hafði rætt við hann.
Skömmu eftir klukkan átta í gær var lögreglu tilkynnt um einstakling í annarlegu ástandi í verslun í miðborginni. Var það í annað sinn um kvöldið sem lögregla hafði afskipti af þessum um kvöldið og var hann því handtekinn og fékk að dúsa í fangageymslu.
Ekki löngu síðar fékk lögregla aftur tilkynningu um aðila í annarlegu ástandi í miðborginni. Sá var að angra fólk og sinnti ekki ítrekuðum fyrirmælum lögreglu um að láta af hegðun sinni og fékk því að sofa úr sér í fangageymslu.
Ölvaður einstaklingur örmagnaðist fyrir utan heimahús í miðborginni skömmu fyrir klukkan tvö í nótt og var lögregla kölluð til. Í ljós kom að viðkomandi átti heima í húsinu en hafði ekki haft orku í að koma sér inn. Lögreglumenn aðstoðuðu viðkomandi við að komast inn og upp í rúm.
Lögregla var kölluð út í nótt vegna rafskútuslysa. Einn hafði lent í slysi í Hlíðunum, annar lenti í slysi í Hafnarfirði og þurfti að vera fluttur með sjúkrabifreið á slysadeild og einn lenti sem betur fer ekki í slysi – sá hafði verið undir áhrifum á rafskútu og átti erfitt með að stýra skútunni, því var lögregla kölluð til áður en illa fór.
Lögregla var í þrígang kölluð út vegna yfirstandandi innbrota. Tveir gerendur fundust fljótt og voru handteknir., sá þriðji var farinn af vettvangi er lögreglu bar að garði og fannst ekki þrátt fyrir leit.
Í nótt var ekið á tvo ljósastaura í Breiðholti. Í öðru tilvikinu var þrennt handtekið í þágu rannsóknar málsins og í hinu tilvikinu átti slysið sér stað fyrir augum lögreglumanna og er ökumaður grunaður um akstur undir áhrifum.
Þó nokkrir eru grunaðir um ölvunarakstur eða akstur undir áhrifum fíkniefna eftir nóttina.
Lögreglu bárust nokkrar tilkynningar í nótt um slagsmál og líkamsárásir. Flest átt átti sér stað í miðborginni nærri skemmtistöðum en eitt útkall varðaði slagsmál í heimahúsi. Þar hafði einn hlotið stungusár á hendi og voru tveir handteknir og færðir í fangageymslu vegna málsins.
