Annie Wright kynntist kærastanum sínum, Michael Head, í október í fyrra í gegnum stefnumótaforritið Tinder. Tveimur vikum eftir að þau kynntust hafði hún útbúið 17 blaðsíðna samning fyrir sambandið þeirra.
The Sun fjallar um samninginn þeirra en í honum kemur til að mynda fram að hann eigi að borga fyrir stefnumót og að hann eigi að kaupa blóm fyrir hana tvisvar í mánuði. Þá er þess einnig krafist að hann hreyfi sig 5 sinnum á viku.
Ástæðan fyrir því að hin 21 árs gamla Annie gerði þennan samning er sú að hún var tiltölulega nýkomin úr vondu sambandi með manni sem hafði farið yfir mörk hennar. Annie grínaðist með það í byrjun með Michael að hún þyrfti að gera skilmála fyrir hann ef hann skyldi vilja byrja með henni. Michael er laganemi og fannst það vera afbragðs hugmynd.
„Þetta er búið að breyta leiknum, ég mæli með því að öll pör geri svona samning. Þetta er það besta í heimi,“ segir Annie.„Við hugsum nánast um sambandið okkar sem viðskiptasamstarf. Við leysum vandamál eins og félagar í viðskiptum myndu leysa vandamál. Við sitjumst niður og lögum það sem er að sem félagar.“