Næstkomandi mánudag hefst aðalmeðferð í Rauðagerðismálinu í Héraðsdómi Reykjavíkur og er búist við að hún standi í minnst fjóra daga. Samkvæmt upplýsingum frá Kolbrúnu Benediktsdóttur, varahéraðssaksóknara, sem mun sækja málið fyrir hönd ákæruvaldsins, munu fjórmenningarnir sem ákærð eru í málinu bera vitni á mánudag. Frá og með þriðjudegi taka við vitnaleiðslur lögreglumanna og annarra aðila sem tengjast málinu.
Fyrir liggur að Albaninn Angjelin Sterkaj varð landa sínum Armando Beqirai að bana laugardagskvöldið 13. febrúar síðastliðinn með því að skjóta hann níu skotum úr skammbyssu fyrir utan heimili Armando í Rauðagerði. Armando lætur eftir sig eiginkonu og tvö börn, en síðara barnið var í móðurkviði er hann var myrtur.
Héraðssaksóknari hefur ákært þrjár aðrar manneskjur í málinu, þar af eina konu, Claudu Sofiu Coelho Carvalho, sem sökuð er um að hafa fylgst með Armando og veitt upplýsingar um ferðir hans kvöldið sem hann var myrtur. Murat Selivrada er sakaður um að hafa leiðbeint Claudiu um þessar njósnir og Shpetim Qerimi er sagður hafa verið í bíl með Angjelin er hann hélt upp í Rauðagerði til að myrða Armando.
Héraðssaksóknari segir morðið hafi verið samantekin ráð hjá þessum manneskjum. Þær neita allar sök nema Angjelin, sem hefur játað á sig morðið, en segist hafa verið einn að verki.
Dómurinn mun skera úr um hvort morðið var samverknaður fjögurra (eða færri) manneskja eða hvort Angjelin var einn að verki. Það er þó alls ekki stærsta ósvaraða spurningin í málinu heldur sú hver var morðástæðan.
Íslendingurinn Anton Kristinn Þórarinsson var um tíma grunaður um hlutdeild í málinu og sat í gæsluvarðhaldi. Hann hefur nú verið hreinsaður af þeim grun og var ekki ákærður í málinu. Vitað er að Anton hafði tengsl við þá Angjelin og Shpetim Qerimi og var í sambandi við þá dagana fyrir og eftir morðið. Grunsemdir voru um að morðið hefði verið framið í þágu Antons en svo mun ekki vera. Vitað er að mikið ósætti var á milli Angjelin og Armando en ekki hefur verið afhjúpað í hverju það var fólgið og því síður hvernig það gat leitt til þess að fjórar manneskjur lögðu á sig að sameinast um morðið, ef ákæra héraðssaksóknara reynist á rökum reist.
Í samtali við DV segir Kolbrún Benediktsdóttir varahéraðssaksóknari að morðástæða frá sjónarhóli ákæruvaldsins muni einfaldlega koma í ljós er hún flytur málið og var hún ekki tilbúin að gefa neitt upp um þetta. Engin ástæða er tilgreind í ákærunni enda er það ekki hlutverk ákærutexta að tilgreina ástæður glæpa.
Fyrirtaka í málinu var í morgun (þriðjudag) og lögðu þá sakborningar fram greinargerðir til málsvarnar gegn ákærunni. Þær greinargerðir gætu varpað ljósi á morðástæðuna, sérstaklega greinargerð fyrir hönd banamannsins, Angjelin. DV hefur formlega óskað eftir aðgangi að greinargerðunum.
Sem fyrr segir hefst aðalmeðferð í Héraðsdómi Reykjavíkur næsta mánudagsmorgun. DV mun flytja fréttir af málinu beint úr réttarsalnum.
