Blikar fóru góða ferð norður á Akureyri í dag og sigruðu KA 0-2 í Pepsi Max-deild karla. Með sigrinum fóru Blikar á toppinn og var Óskar Hrafn Þorvaldsson að vonum ánægður með liðið en þetta hafði hann að segja í viðtali við Stöð 2 Sport eftir leik.

„Þetta er alltaf erfiður völlur að koma á. KA liðið er mjög öflugt, vel spilandi og gott lið. Þannig að það að koma hingað og vinna 2-0 og vinna nokkuð sannfærandi er frábært. Maður verður að vera auðmjúkur og stoltur af liðinu. Allt liðið á hrós skilið,“ sagði Óskar við Stöð 2 Sport eftir leik.

„Við erum búnir að skora mikið af mörkum en eigum engan sem er nálægt því að verða markahæstur í deildinni og auðvitað er kostur að vera ekki háður einum leikmanni fyrir markaskorun. Við búum svo vel að eiga marga leikmenn sem hafa verið að skora. Þetta sýnir styrkleika og breiddina í sóknarleiknum.“

Blikar hafa oft verið gagnrýndir fyrir það að kunna illa við sig í toppsætinu og þegar þeim er hrósað hvað mest og þeir taldir líklegastir til sigurs þá verður pressan of mikil.

„Ég hef enga reynslu af því að vera í toppsætinu með Breiðablik. Það er alltaf þessi stöðuga pressa og ég held að það sé mikilvægt að faðma hana, umvefja og elska hana. Passa að láta hana ekki fara að stjórna sér. Það eru fjórir leikir eftir og okkur bíður erfiður leikur á útivelli gegn Fylki á sunnudag,“ sagði Óskar Hrafn að lokum við Stöð 2 Sport.