Eiður Smári Guðjohnsen aðstoðarþjálfari íslenska landsliðsins segist hafa tekið á sínum málum eftir að hafa fengið skriflega áminningu og verið sendur í leyfi af KSÍ í sumar. Þetta kemur fram í viðtali við Vísir.is.
Málið kom upp eftir að fjölmiðlar sögðu frá atviki er varðar Eið Smára í miðbæ Reykjavíkur þar sem hann kastaði þvagi af sér utandyra. „Eiður Smári hefur fengið skriflega áminningu í tengslum við starfsskyldur sínar hjá KSÍ og fer nú í tímabundið leyfi frá störfum, en mun snúa aftur af fullum krafti með landsliðinu í verkefnum haustsins. KSÍ lýsir yfir stuðningi við Eið Smára og hans ákvörðun um að leita sér hjálpar og óskar honum alls hins besta,“ sagði í yfirlýsingu KSÍ í sumar.
Eiður Smári segir við Vísir.is í dag að hann hafi tekið á sínum málum. „Svo ég vitni nú kannski bara í yfirlýsinguna sem var gefin út á sínum tíma, þá held ég að ég hafi tekið á þeim málum og ég held að KSÍ hafi líka gert það. Svo lítum við bara fram á veginn og erum ekkert að horfa of mikið til baka,“ sagði Eiður.
Henry Birgir Gunarsson spurði Eið þá hvað hann hefði gert til að taka málunum. „Nei, ég held að allt sem tekur á í persónulega lífinu, heldur maður bara þar.“
Arnar Þór svaraði fyrir málið:
Arnar Þór Viðarsson þjálfari liðsins ræddi málið við Fótbolta.net af sama tilefni en hann kveðst hafa fundað með Eiði Smára vegna málsins. . „Okkar samstarf hefur alltaf verið mjög gott, rauði þráðurinn í gegnum það er vinátta. Við höfum verið vinir í mörg mörg ár, spiluðum saman í landsliðinu og saman í Belgíu. Við vinnum vel saman af því að við erum vinir,“ sagði Arnar við Fótbolta.net.
Hann segist hafa rætt tvær hliðar málsins við Eið Smára og að hann hafi fengið tíma til að leysa sín vandamál.
„Ef við eigum að ræða hans mál og það sem gerist núna í sumar, þá eru það tvær mismunandi stöður frá mínu sjónarhorni. Öðru leytinu er þetta vinur þinn sem er í smá veseni, þú vilt standa með vini þínum og gera allt sem þú getur til að hjálpa honum. Að hinu leytinu erum við í miklvægari vinnu, mikilvægari stöðu og getum ekki leyft okkur að haga okkur hvernig sem er. Báðar þessar hliðar hef ég rætt við Eið Smára, sem vinur og svo hinu megin frá að þetta sé ekki í boði; við þurfum að standa okkur í starfi. KSÍ tók síðan bara á því máli, hann fékk þessa skriflega viðvörun og var sendur í leyfi til þess að sortera sín vandamál.“
