Cristiano Ronaldo vill komast til Manchester City frá Juventus. Þetta segir franska blaðið L’Equipe.
Hinn 36 ára gamli Ronaldo á eitt ár eftir af samningi sínum hjá Juventus. Hann hefur verið orðaður í burtu frá liðinu undanfarna daga. Paris Saint-Germain, Real Madrid og Man City hafa verið nefnd til sögunnar. Samkvæmt L’Equipe er síðastnefnda félagið efst í huga Portúgalans eins og er.
Ronaldo er þegar sagður hafa sett sig í samband við samlanda sína hjá Man City, Bernardo Silva, Ruben Dias og Joao Cancelo.
Man City er þó ekki tilbúið að reiða fram háa upphæð fyrir Ronaldo. Það er þó tilbúið til þess að senda annan leikmann til Juventus á móti. Þá munu launakröfur kappans ekki vera hindrun fyrir Englandsmeistaranna.
Það yrði ansi áhugavert ef Ronaldo gengur í raðir Man City, sérstaklega í ljósi þess að hann lék fyrir Manchester United á árunum 2003 til 2009. Hann er dýrkaður af stuðningsmönnum í rauða hluta Manchester-borgar.
