Thomas Tuchel sagði stjórnarnefnd Chelsea að hugsa sig tvisvar um áður en það ræki Frank Lampard, forvera hans hjá félaginu.

Tuchel var ráðinn í stað Lampard í janúar síðastliðnum þegar Chelsea var í 9. sæti í ensku úrvalsdeildinni. Tuchel hefur síðan gjörbreytt liðinu og vann meðal annars Meistaradeildina á síðustu leiktíð. Þjóðverjinn hefur síðan sagt að hann efaðist um ákvörðun Chelsea að reka Lampard þegar hann talaði fyrst við félagið, en fékk þau skilaboð að örlög Lampard hjá Chelsea væru þegar ráðin.

„Ég sagði í símtali við stjórnarnefndina: eruð þið vissir með þetta? Af því að þetta mun ekki falla stuðningsmönnum í geð. Kannski á hann skilið meiri tíma. Vegna þess að þegar ég hugsa um Chelsea, hugsa ég um Frank Lampard, John Terry, Petr Chech, Didier Drogba,“ sagði Tuchel í samtali við Sky Sports.

„Ég hugsaði strax um hann vegna þess að hann er ímynd Chelsea: harðduglegur, ákafur, mikill leiðtogi, en á sama tíma venjulegur náungi utan vallar og góður liðsmaður. Sannkölluð goðsögn. Ég skildi hins vegar að það væri búið að taka ákvörðun og að ég hefði einungis um tvennt að velja.“

Lampard var sagt upp eftir eitt of hálft ár við stjórnvölinn hjá Chelsea. Hann var ráðinn sumarið 2019 og kom liðinu í 4. sæti á fyrsta tímabili sínu hjá félaginu, þrátt fyrir að Chelsea hafi verið í félagsskiptabanni. Hann var einnig ábyrgur fyrir þróun nokkurra yngri leikmanna Chelsea, þar á meðal Mason Mount, Reece James og Tammy Abraham, sem fór til Roma á dögunum fyrir 34 milljónir punda.