Skúli Mogensen og Gríma Björg Thorarensen hafa eignast glæsilega fasteign við Bárugötu 11. Um er að ræða 456 fermetra hús þar sem Hótel Hilda hefur rekið 15 herbergja hótel undanfarin ár. Áður hýsti húsið starfsemi gistiheimilisins Ísafoldar.

Fasteignin og hótelreksturinn hafa frá árinu 2013 verið í eigu S9 ehf., félags í eigu Margrétar Ásgeirsdóttur, barnsmóður og fyrrverandi eiginkonu Skúla. Í sumar eignaðist félagið BG11 ehf. fasteignina. Afsal þess efnis hefur verið þinglýst.

BG11 ehf. er í helmingseigu Skúla og Grímu Bjargar. Parið beið ekki boðanna og hefur þegar sótt um leyfi til Reykjavíkurborgar til þess að breyta innra skipulagi hússins þannig að það verði ekki lengur gististaður í flokki lll heldur færist yfir í upprunalegt horf sem einbýli. Leyfisbeiðnin var tekin fyrir á síðasta afgreiðslufundi byggingarfulltrúa Reykjavíkur og samþykkt.

Þar kemur fram að Skúli og Gríma Björg hyggist fækka svefn- og baðherbergjum í húsinu sem og að fjarlægja lyftu sem er þar innandyra. Fréttasíða Eiríks Jónssonar greindi fyrst frá.