Vegna heimsfaraldursins hafa íslensk flugfélög og ferðaskrifstofur aflýst sólarlandaferðum í sumar og haust. Heimsferðir hafa aflýst fjórum ferðum til Malaga og þremur til Alicante. Vita hefur aflýst fjórum ferðum til Krítar.

Fréttablaðið skýrir frá þessu í dag. Haft er eftir Tómasi J. Gestssyni, framkvæmdastjóra Heimsferða, að nokkuð hafi borið á því að fólk hafi vilja fresta ferðum en greinilegt sé að það ætlar að ferðast síðar. „Það hefur náttúrlega aðeins dregið úr eftirspurninni og svo hefur fólk viljað fresta ferðinni sinni. Þess vegna höfum við brugðið á það ráð að draga aðeins úr framboðinu,“ er haft eftir honum.

Hvað varðar þau flug sem hafa verið felld niður sagði hann að farþegum verði boðið upp á fulla endurgreiðslu en ef fólk afbóki flug sem verða farin eða vilji breyta þeim þá gildi ferðaskilmálar.

Þráinn Vigfússon, framkvæmdastjóri Vita, sagði að reglur um að allir sem koma til landsins verði að framvísa neikvæðu PCR-prófi hafi neikvæð áhrif á bókanir. „Það hefur náttúrlega haft slæm áhrif og við mátum það þannig að þar sem þetta er stutt „season“ hjá okkur til Krítar að einbeita okkur að Alicante og Tenerife,“ sagði hann. Hann sagði að öllum, sem ætluðu í ferðirnar til Krítar, hafi verið boðin full endurgreiðsla eða inneign fyrir aðra ferð.