Jacob Caldwell, fjórtán ára piltur í Ohio í Bandaríkjunum, varð vitni að skelfilegu atviki í fyrrasumar. Jacob, ásamt tveimur systkinum sínum, varð vitni að því þegar faðir hans, Robert Caldwell, var myrtur.
Robert var skotinn til bana á bílastæði í bænum Caldwell í ágúst í fyrrasumar. Aðeins sex dögum síðar hvarf Jacob sporlaust og hefur hann ekki sést frá þessum örlagaríka degi. Móðir Jacobs og fyrrverandi eiginkona Roberts, Tawney Caldwell, hefur verið ákærð fyrir morðið í ágúst ásamt öðrum manni, Sterling Roberts. Leikur grunur á að Tawney hafi skipulagt ódæðið og Sterling framið það.
Málið þykir býsna óhugnanlegt enda eru liðnir sjö mánuðir frá hvarfi Jacobs. Amma hans ætlaði að athuga með líðan hans kvöld eitt í ágúst í fyrrasumar en þá var hann horfinn. Tawney er talin búa yfir upplýsingum um son sinn en hefur ekki reynst samvinnufús í yfirheyrslum hjá lögreglu. Er jafnvel talið að hún hafi látið hann hverfa af ótta við að hann myndi bera vitni í hugsanlegu dómsmáli.
Sem fyrr segir hafa Tawney og Sterling verið ákærð fyrir morðið á föður Jacobs og gætu þau átt dauðarefsingu yfir höfði sér. Fjórir aðrir eru ákærðir í málinu en þáttur þeirra er talinn mun minni en hinna tveggja.
