Landspítali er á hættustigi vegna nýjustu bylgju Covid-19 hér á landi. Spítalinn hefur sent út frá sér tilkynningu með stöðunni á spítalanum klukkan 12 í dag.
Þrír eru inniliggjandi á spítalanum og 369 eru í eftirliti á COVID-göngudeild, þar af eru 28 börn. Sjö starfsmenn eru í einangrun, 14 í sóttkví A og 229 í vinnusóttkví.
Verið er að leita leiða til að hefja á ný matarskömmtun og matarsendingar á deildir líkt og gert hefur verið í fyrri bylgjum faraldursins. „Á því eru ákveðin vandkvæði en á meðan verið er að leysa úr því er starfsfólk beðið um að gæta ítrustu varúðar í matsölum og virða eins metra fjarlægðamörk þegar grímur er teknar niður til að matast. Þá taka aftur gildi takmarkanir á kaffistofum starfseininga sem miða við eins metra reglu,“ segir í tilkynningunni varðandi matsali og kaffistofur.
Þá kemur fram að smitsjúkdómadeildin sé ekki fullopin þar sem nú eru þar þrír COVID-sjúklingar og viðbúið er að þeim fjölgi á næstu sólarhringum.
Viðbragðsstjórn og farsóttanefnd funda alla daga kl. 11:30 í kjölfar stöðumats spítalans. Eftir fundinn eru svo gefnar út tilkynningar um stöðuna og nýjar reglur eða tilmæli sem birtar eru á öllum miðlum Landspítala.
