Um klukkan 17 í gær óskuðu erlendir ferðamenn eftir aðstoð lögreglunnar því þeir fundu ekki bifreið sína. Lögreglan aðstoðaði ferðamennina við að leita að bifreiðinni nærri þeim stað þar sem þeir sögðust hafa lagt henni en án árangurs. Talsvert af persónulegum munum ferðamannanna var í bifreiðinni og því mikið í húfi. Klukkan 04.45 fannst bifreiðin síðan töluvert frá þeim stað þar sem ferðamennirnir sögðust hafa lagt henni. Ekki var að sjá að hún hefði verið hreyfð. Málið endaði því vel fyrir ferðamennina sem eiga flug til síns heima í dag.

Í miðborginni var rafmagnshlaupahjóli stolið á sjöunda tímanum í gær. Vitað er hver stal því og er málið í rannsókn. Tilkynnt var um líkamsárás og þjófnað við heimahús í miðborginni rétt fyrir klukkan sjö í gær. Lögreglan ræddi við brotaþola og vitað er hver gerandinn er og er málið í rannsókn.

Á áttunda tímanum var tilkynnt um innbrot í geymslu í miðborginni.

Um klukkan 23 voru tveir handteknir í miðborginni, grunaðir um líkamsárás. Þeir voru vistaðir í fangageymslu.

Einn var handtekinn í miðborginni á öðrum tímanum í nótt eftir að tilkynnt var að viðkomandi væri að fara inn í bifreiðar sem hann átti ekki. Hann reyndist eftirlýstur vegna annars máls og var því handtekinn og vistaður í fangageymslu.

Á öðrum tímanum í nótt féll maður af rafmagnshlaupahjóli í miðborginni og slasaðist. Lögregla og sjúkraflutningamenn fóru á vettvang.

Á þriðja tímanum í nótt var ölvaður maður handtekinn við veitingastað í miðborginni en hann var til vandræða. Hann var vistaður í fangageymslu.

Einn ökumaður var handtekinn í gærkvöldi en sá er grunaður um að hafa verið undir áhrifum fíkniefna og ítrekaðan akstur sviptur ökuréttindum.