Samkeppniseftirlitið hefur lokið rannsókn sinni á samkeppnisbrotum Eimskips. Hefur fyrirtækið viðurkennt brot sín og fallist á að greiða sekt að fjárhæð 1,5 milljarðar króna.
Þetta kemur fram í tilkynningu á vef Samkeppniseftirlitsins.
Um er að ræða ólöglegt verðsamráð en brotin eru eftirfarandi, orðrétt úr tilkynningu Samkeppniseftirlitsins:
- Samráð við Samskip á síðari hluta ársins 2008 um breytingar á siglingakerfum og takmörkun á flutningsgetu í sjóflutningum til og frá Íslandi.
- Samráð við Samskip um skiptingu á mörkuðum eftir stærri viðskiptavinum í sjó- og landflutningum. Samráð þetta var umfangsminna á lokaári rannsóknartímabilsins (á árinu 2013).
- Samráð við Samskip um álagningu gjalda og afsláttarkjör í flutningaþjónustu og um miðlun á mikilvægum verð- og viðskiptaupplýsingum. Samráð þetta var umfangsminna á lokaári rannsóknartímabilsins (á árinu 2013).
- Samráð við Samskip um landflutningaþjónustu á flutningaleiðum á Íslandi og skiptingu á mörkuðum á tilteknum flutningaleiðum.
- Samráð við Samskip um sjóflutninga milli Íslands og annarra Evrópulanda, og aðrar aðgerðir sem miðuðu að því að raska samkeppni í flutningsþjónustu.
- Samráð við Samskip um sjóflutninga milli Íslands og Norður-Ameríku þegar ekki var í gildi undanþága frá 10. gr. samkeppnislaga.
Fyrir utan sektina felst einnig í sáttinni að Eimskip skuldbindur sig til að vinna gegn frekari samkeppnisbrotum í framtíðinni.
