Hún sagðist ekki vita betur en að í Bandaríkjunum væru notuð bóluefni sem Evrópska lyfjastofnunin hefur samþykkt til notkunar og það muni gefa Bandaríkjamönnum færi á að ferðast til aðildarríkja ESB.
Hún kom ekki með neinar tímasetningar um hvenær megi reikna með að opnað verði fyrir ferðir Bandaríkjamanna til álfunnar eða hvernig framkvæmdin verður. ESB lokaði fyrir allar ónauðsynlegar komur útlendinga til ESB fyrir rúmlega ári síðan vegna heimsfaraldursins.
CNN hefur eftir Andy Slavitt, aðalráðgjafa Hvíta hússins í málefnum tengdum heimsfaraldrinum, að ummæli von de Leyen séu staðfesting á góðum árangri Bandaríkjamanna við bólusetningar. „Það sem heimurinn er í raun að segja er að hann horfir til Bandaríkjanna, hann horfir á góðan árangur bólusetningaáætlunar okkar. Hann horfir á fækkun smita og um leið og hann veit að við höfum ekki enn lokið verkefninu þá segir hann að Bandaríkjamenn megi koma því þeir beri ekki COVID-19 með sér. Hugsið um þetta. Þetta er ótrúlegt. Fyrir nokkrum mánuðum voru við það ríki heims sem var einna einangraðast varðandi ferðalög. Þetta sýnir bara hversu vel hefur gengið að bólusetja Bandaríkjamenn á síðustu mánuðum,“ sagði hann.
CNN segir að miðað við gögn frá Bandarísku smitsjúkdómastofnuninni CDC þá hafi 28% Bandaríkjamanna lokið bólusetningu.
