Tottenham tók á móti Manchester United í ensku úrvalsdeildinni í gær. Leiknum lauk með 3-1 sigri Manchester United en leikið var á heimavelli Tottenham í Lundúnum. Á 33. mínútu kom Edinson Cavani, Manchester United yfir með marki eftir stoðsendingu frá Paul Pogba.
Markið var hins vegar skoðað í VAR og þar var komist að þeirri niðurstöðu að Scott McTominay, miðjumaður Manchester United, hafði brotið af sér í uppbyggingu sóknarinnar þegar að hann slæmdi hendinni í andlit Heung Min Son, sóknarmann Tottenham. Markið var því ekki tekið gilt og aukaspyrna dæmd.
Mikil umræða skapaðist um atvikið og fékk Son mikla gagnrýni, þá mátti hann sitja undir rasískum skilaboðum á samfélagsmiðlum að leik loknum.
Sóknarmaðurinn frá Suður Kóreu var niðurbrotin eftir leik, hann var við það að bresta í grát þegar hann fór í viðtal. „Ég er svo svekktur, ég veit í raun ekki hvað skal segja,“ sagði Son og heyra mátti að rödd hans var við það að bresta.
„Ég er mjög leiður yfir þessu og mér líður bara mjög illa,“ sagði Son en viðtalið má sjá hér að neðan.
Sonny has his say on today's game.#THFC ⚪️ #COYS pic.twitter.com/koVOKGQZ8P
— Tottenham Hotspur (@SpursOfficial) April 11, 2021
