Christopher Pekny, 28 ára íbúi í New York-fylki, var að undirbúa það að tilkynna hvers kyns ófætt barns hans og konu sinnar væri. BBC greinir frá. Hann var að byggja sprengju ásamt bróður sínum sem átti að gefa í skyn hvers kyns barnið væri, þegar hún sprakk með þeim afleiðingum að Christopher lést og bróðir hans slasaðist.

Ekki er vitað nákvæmlega hvað gerðist í aðdraganda slyssins eða hvernig sprengja þetta var en lögreglan hefur gefið út að einhvers konar rör hafi verið hluti af henni. Þetta er ekki í fyrsta sinn sem tilkynning um kyn barns fer úrskeiðis en oft eru flugeldar og litasprengjur notaðar við atburðinn. Þá hafa kviknað skógareldar í Kaliforníu-fylki sem hægt var að rekja til kynjaveislna.

Bandaríkjamenn eru þekktir fyrir að fara aðeins yfir um í veislum þessum og eru dæmi um að notast hefur verið við krókódíla, byssur og sportbíla til að tilkynna kyn barnsins. Kynjaveislur eru nýjung á Íslandi en hægt er að kaupa til dæmis blöðrur með lituðu skrauti í helstu partýbúðum landsins til að notast við í veislunum.