Gengi Liverpool á leiktíðinni hefur ekki verið nægilega gott. Liðið situr í 4. sæti ensku úrvalsdeildarinnar með 40 stig eftir 4-1 tap gegn Manchester City í gær. Á sama tíma á síðasta tímabili var liðið með 67 stig og hampaði að lokum Englandsmeistaratitlinum.

„Fyrir mitt leiti hafa þeir verið vondir meistarar. Þið getið sagt að þetta tímabil sé einsdæmi útaf Covid-19 en haldið bara áfram. Þið eruð meistarar, þið eruð Liverpool. Ef þið haldið áfram að spila svona munu líða önnur 30 ár þangað til þið vinnið næsta titil,“ sagði Roy Keane, sérfræðingur SkySports eftir leik Liverpool og Manchester City í gær.

Manchester City situr nú á toppi ensku úrvalsdeildarinnar með fimm stiga forskot á á Manchester United og leik til góða. Roy Keane og Jamie Carragher telja að aðalatriðið fyrir Liverpool núna sé að enda í efstu fjórum sætum deildarinnar.

Roy Keane gefur lítið fyrir tal um að meiðslavandræði Liverpool sé um að kenna þegar kemur að úrslitum á þessu tímabili.

„Fólk heldur áfram að segja mér að Liverpool sé risastór klúbbur. Ef þeir eru rísastór klúbbur þá verða þeir að takast á við svona bakslög, er það ekki hluti af leiknum? (að leikmenn meiðast) Ef allir leikmenn væru alltaf heilir þá væri það frábært. Horfið á Manchester City, við getum fært rök fyrir því að þeim vanti sína bestu leikmenn (Kevin De Bruyne og Sergio Aguero). Það vantaði leikmenn í lið Liverpool í dag en þeir höfðu samt sem áður sína bestu sóknarmenn.

Næsti leikur Liverpool í ensku úrvalsdeildinni er gegn Leicester City þann 13. febrúar.