Arsenal fékk Mat Ryan á láni frá Brighton fyrir helgi, þessi 28 ára markvörður verður hjá félaginu út þessa leiktíð. Ryan er landsliðsmaður frá Ástralíu en hann hefur spilað 124 leiki fyrir Brighton eftir að hann kom til félagsins árið 2017.

Arsenal hefur leitað að markverði í janúar til að veita Bernd Leno samkeppni, Rúnar Alex Rúnarsson hefur verið keppinautur Leno síðustu mánuði. Rúnar kom til Arsenal síðasta haust frá Dijon, enskir miðlar hafa fjallað um að Rúnar hafi alltaf verið hugsaður sem þriðji kostur í markið.

Óvissa hefur verið um framtíð Rúnars og taldar eru líkur á að Arsenal muni lána hann á næstu dögum. Mikel Arteta fagnar komu Mat Ryan en segir það enginn endalok fyrir Rúnar Alex.

„Mat er leikmaður sem þekkir deildina vel, hann hefur spilað marga leiki og er með reynslu úr landsliði. Hann er á fínum aldri. Við töldum okkur þurfa inn annan markvörð eftir að Matt Macey fór,“ sagði Arteta á fréttamannafundi í gær.

Arteta var svo spurður að því hvaða þetta hefði í för með sér fyrir Rúnar Alex.

„Við þurfum að vera með þrjá markverði og þeir verða að berjast um stöðurnar. Þeir setja pressu á hvorn annan og allir fá sitt hlutverk, þegar þú hefur fengið hlutverk þá er það í þínum verkahring að styðja við liðsfélaga þína. Þú reynir að verða betri“ sagði Arteta.