„Fáránleiki efnahagsstefnu ríkisstjórnarinnar birtist í uppblásnu eignaverði á krepputímum þegar þúsundir hafa misst vinnuna og grafist niður í djúpa fátækt.“
Svona hefst pistill sem Gunnar Smári Egilsson, stofnandi Sósíalistaflokks Íslands, skrifar en pistillinn birtist á Miðjunni fyrr í dag. „Ríkið hefir prentað nýtt fé og dælt því til hinna efnameiri sem nota það til að kaupa gamlar eignir, ekki til að búa til ný störf eða auka neyslu sem örvar hagkerfið. Hvernig stendur á þessu?“ spyr Gunnar.
Hann segir ríkisstjórnina vera keyrða áfram á gömlu stýrikerfi. Stýrikerfið sem Gunnar talar um er nýfrjálshyggjan. Gunnar segir að öllum ætti að vera orðið ljóst að nýfrjálshyggjan er ekki bara heimskuleg heldur einnig stórhættuleg. „Magnar ójöfnuð, færir fé linnulaust frá þeim sem lítið sem ekkert eiga til þeirra sem mikið eiga,“ segir Gunnar um nýfrjálshyggjuna.
„Ríkisstjórnin skilur þetta ekki. Hún er eins og Trump, heldur að eignabóla á hlutabréfamörkuðum sé merki þess að allt sé í lagi; ef að hin allra ríkustu séu kát þá sé ekkert að óttast. Hlutabréfamarkaður á Íslandi og fasteignamarkaðurinn eru í bóluástandi. Þar er virði eigna blásin upp, aðeins tímaspursmál hvenær blaðran springur,“ segir Gunnar.
„Þá munu hin ríku gráta og ríkisstjórnin hlaupa til og hugga þau með fjárgjöfum.“