„Þjóðverjarnir hafa engar sannanir,“ er haft eftir portúgölskum rannsóknarlögreglumönnum um mál Madeleine McCann sem hvarf úr orlofsíbúð í Portúgal vorið 2007, rétt fyrir fjögurra ára afmælisdag sinn.
Í fangelsi í Braunschweig í Þýskalandi situr 43 ára gamall maður að nafni Christian Brückner. Hann situr af sér dóm fyrir fíkniefnasmygl en síðan tekur við sjö ára fangelsisvist vegnan nauðgunar á bandarískri konu í Portúgal árið 2005. Héraðssaksóknarinn í Braunschweig er sannfærður um að Christian hafi numið Madeleine litlu á brott og myrt hana. Hann segist hafa sannanir. Þetta dregur portúgalska alríkislögreglan í efa.
Farið er yfir málið í grein á Bild.
Þar sem Christian er að sitja af sér langa fangelsisdóma fyrir önnur mál hefur þýska alríkislögreglan sem rannsakar málið nægan tíma til að ákæra hann. Portúgalskir rannsóknarlögreglumenn óttast hins vegar að hann verði aldrei ákærður. Þeir undrast vinnubrögð og yfirlýsingar þýsku lögreglunnar í málinu. Samkvæmt Bild er rígur og ósamkomulag á milli þýsku og portúgölsku lögreglunnar.
Þýska alríkislögreglan (Bundeskriminalamt), Policia Judiciária í Portúgal og Scotland Yard hittust á fundi fyrir skömmu vegna málsins. Scotland Yard rannsakar málið ennþá sem mannshvarfsmál en þýska lögreglan rannsakar það sem morðmál og gengur út frá því að Madeleine McCann sé látin. Bild hefur undir höndum tölvupóst þar sem fulltrúi portúgölsku lögreglunnar gagnrýnir þýsku lögregluna og segir meðal annars: „Þjóðverjarnir hafa engar sannanir, bara vangaveltur. Það var sjokkerandi að skoða þýsku gögnin. Mig hefði ekki grunað að Bundeskriminalamt rannsakaði svona illa. Þarna er ekki að finna neina alvarlega, óhlutdræga og hlutlæga rannsókn, heldur bara þann ásetning að halda hinum grunaða með öllum ráðum í fangelsi.“
Christian þarf hins vegar að sitja af sér svo langa tíma fyrir önnur afbrot að þýska lögreglan hefur nægan tíma til að safna sönnunargögnum gegn honum.
Bild segir að oft hafi komið upp rígur á milli lögregluembætta mismunandi landa vegna Madeleine McCann málsins. Portúgalski rannsóknarlögregluforinginn Goncalo Amaral missti starf sitt vegna harðrar gagnrýni sinnar á Scotland Yard. Portúgalska lögreglan hefur ávallt haft foreldra stúlkunnar meira undir grun en Scotland Yard, sem hefur beint rannsókninni að ókunnugum, mögulegum gerendum. Þegar böndin bárust að Þjóðverjanum Christian Brückner blönduðust þýsk lögregluyfirvöld í málið.
