Aðalmeðferð var í Héraðsdómi í dag yfir Litháanum Arturas Leimontas, en hann er ákærður fyrir morð á samlanda sínum þann 9. desember 2019. Í ákæru er Arturas sagður hafa slegið manninn hnefahöggum, sparkað í höfuð hans og líkama, slegið hann þungu höggi í höfuðið með þungu áfalli og í kjölfarið kastað honum fram af svölum íbúðar í Úlfarsárdal þannig að hann féll tæplega 7 metra á steypta stétt og lést af áverkum sínum.

RÚV greinir frá því að maðurinn hafi látist vegna áverka á höfði og brjóstkassa. Höfuðkúpubrot hafi komið til annaðhvort vegna fallsins af svölunum eða hann hafi verið sleginn í höfuðið.

Tveir réttarlæknar gáfu skýrslu fyrir dómnum í dag. Annars vegar Pétur Guðmann Guðmannsson, réttarlæknir Landspítala,  og hins vegar þýskur réttarlæknir og sérfræðingur í taugalækningum. Samkvæmt þeim benda áverka á höfði mannsins til þess að hann hafi fallið á eitthvað oddhvasst eða verið sleginn með einhverju. Áverkarnir bendi ekki til þess að þeir hafi komið til vegna falls á slétta stéttina fyrir neðan svalirnar.

Verjandi Arturas spurði hvort maðurinn hefði getað svipt sig lífi með því að stökkva fram af svölunum. Réttargæslulæknirinn sagði það vera ólíklegt. Læknirinn sagði einnig að áverkar á búk og andliti mannsins verði ekki útskýrðir öðruvísi en þeir séu eftir einhvers konar högg.

Arturas Leimontas neitar sök í málinu og segist ekki hafa ráðist á manninn. Hann veitti mótspyrnu við handtöku á vettvangi og þurfti lögregla að beita hann valdi.