Víðir Reynisson yfirlögregluþjónn hjá Almannavarnadeild Ríkislögreglustjóra boðar hertar aðgerðir í baráttunni við COVID-19 veiruna. Þetta gæti orðið til þess að Íslandsmótin í knattspyrnu verða blásin af.

Stefnt var að því að hefja leik á Íslandsmótunum í knattspyrnu um aðra helgi, en til þess þarf að létta á regluverkinu og leyfa keppnisíþróttir. Veiran virðist aftur á uppleið og vilja yfirvöld herða aðgerðir.

Ef hertar aðgerðir taka gildi gæti það orðið til þess að útilokað verður að klára Íslandsmótin fyrir 1 desember. Í reglugerð KSÍ kemur fram að reynt verði að spila mótin til 1 desember.

„Þetta er þungt að fá og sóttvarnalæknir er að skoða það að mæla fyrir hertum aðgerðum. Við lítum þetta mjög alvarlegum augum og teljum stöðuna vera mjög alvarlega í augnablikinu,“ sagði Víðir um stöðu mála.

Það kemur í ljós fyrir helgi hvernig hertar aðgerðir verða og hvort möguleiki sé á að keppnisíþróttir fái undanþágu eins og tíðkast í flestum löndum í Evrópu.