Wayne Rooney markahæsti leikmaður í sögu Manchester United og enska landsliðsins þurfti seint í gærkvöldi að fara í próf vegna COVID-19 veirunnar. Ástæðan er að vinur hans mætti smitaður heim til hans til að selja honum úr.

Josh Bardsley hafði verið útsettur fyrir smiti og smitrakningarteymið í Bretlandi hafði reynt að hafa samband við hann og segja honum að vera heima og fara í próf. Bardsley svaraði ekki síma eða skilaboðum og hélt áfram að vera á meðal fólks.

Bardsley greindist svo í gær með COVID-19 veiruna og því þarf Rooney og öll hans fjölskylda nú að fara í próf til að fá úr því skorið hvort hann hafi smitast. Rooney á eiginkonu og fjóra unga stráka.

Bardsley selur dýr úr til ríka og fræga fólksins í Bretlandi og heimsótti Rooney með nýtt úr fyrir framherja Derby.

Rooney spilaði á föstudag með Derby en í gær fóru hann og öll hans fjölskylda í próf fyrir veirunni. „Josh tjáði ekki Rooney að honum hefði verið sagt að fara í próf fyrir veirunni,“ sagði talsmaður Rooney.