532 börn í leik- og grunnskólum Reykjavíkurborgar voru í sóttkví samkvæmt fyrirmælum sóttvarnarlæknis. Þar af voru 375 grunnskólabörn í sóttkví, eða 2,42% allra grunnskólanemenda borgarinnar, og 157 leikskólabörn eða 2,41% leikskólabarna. Þetta kemur fram í svari Reykjavíkurborgar við fyrirspurn DV.
Staðfest er að allir nemendur í Réttarholtsskóla eru í sóttkví frá gærdeginum og sömuleiðis nemendur í fyrsta og öðrum bekk Vesturbæjarskóla, eða 75 börn í þessum tveimur árgöngum skólans.
Þetta er nokkur fækkun grunnskólabarna í sóttkví frá 8. október þegar 780 reykvísk börnvoru í sóttkví samkvæmt fyrirmælum sóttvarnalæknis eða smitrakningarteymis, þar af 148 leikskólabörn og 632 grunnskólabörn. Þá var til að mynda allt unglingasvið Háteigsskóla í sóttkví, eða þrír árgangar.
Sjá: Tæplega 800 reykvísk börn í sóttkví – fimm leikskólabörn með COVID
213 börn á frístundaheimilum og sértækum félagsmiðstöðvum voru í sóttkví í gær samkvæmt fyrirmælum sóttvarnarlæknis eða 4,8%, en fjöldi þeirra barna getur skarast við fjölda grunnskólabarna.
Í gær var 131 starfsmaður leik- og grunnskóla Reykjavíkurborgar í sóttkví. Þar af voru 79 starfsmenn grunnskóla í sóttkví samkvæmt fyrirmælum sóttvarnarlæknis, eða 2,3% starfsmanna grunnskólanna, og 52 starfsmenn leikskóla eða 2,3%. Þá voru 15 starfsmenn frístundastarfs borgarinnar í sóttkví í gær eða 1,8% starfsmanna.
