Auglýsingin skartar flöktandi ljósum og stórum rauðum þríhyrningi en þessi rauði þríhyrningur er tákn fyrir lyf sem geta haft áhrif á aksturshæfni fólks. Einhverjir gætu haldið að auglýsingin eigi að auglýsa þessi lyf en hún er í rauninni á vegum Samgöngustofu. Auglýsingin er hluti af herferð Samgöngustofu sem gerð er í þeim tilgangi að koma lyfjum og vímuefnum úr umferðinni. Markmið herferðarinnar er að hvetja fólk til þess að aka ekki undir áhrifum lyfja og vímuefna.
Þessi auglýsing hefur þó vakið neikvæða athygli. DV hefur fengið sendar margar ábendingar varðandi auglýsinguna vegna birtingar hennar á vefsíðu DV. „Viljiði gjöra svo vel að taka þessa flöktandi auglýssingu út, ég get ekki horft á þetta,“ sagði kona nokkur sem hafði samband við DV. „Þetta veldur mér vanlíðan og ég veit að þetta getur framkallað köst hjá þeim sem eru með flogaveiki.“
Aðrir voru ekki jafn kurteisir og kona þessi þegar kom að því að gagnrýna birtingu auglýsingarinnar. „Hvaða flass auglýsingar eru í gangi hjá ykkur, eruði hálfvitar eða hvað?“ sagði annar.
Ekki náðist í Þórhildi Elínardóttur, fjölmiðlafulltrúa Samgöngustofu, við gerð fréttarinnar.
