Jón Viðar Matthíasson, slökkviliðsstjóri slökkviliðsins á höfuðborgarsvæðinu, sagði í kvöldfréttum Stöðvar 2 í kvöld að skoða þyrfti hvort beita ætti sektum til að þvinga á um úrbætur þar sem þeirra er þörf.
Tók Jón dæmi af brunaviðvörunarkerfi í húsum: „Þar sem viðvörunarkerfi eru í húsum þarf að hafa eftirlit með þeim, og ef þú gerir það ekki, þá er það í mínum huga ekkert léttvægara brot en til dæmis að brjóta umferðarreglur.“
Húsnæðis- og mannvirkjastofnun vinnur nú að úttekt á þessum málum í kjölfar brunans á Bræðraborgarstíg þar sem þrír létust og fleiri slösuðust. Jón sagðist bíða þeirra skýrslu varðandi framhaldið.
Jón vakti enn fremur athygli á leigumarkaðnum, en slökkvilið hefur ekkert eftirlit með leiguhúsnæði, hvorki skammtímaleigu né langtímaleigu. „Það er ágætis umgjörð i kringum gistiheimilin og hótelin, en er langtímaleiga á heilu húsnæði eitthvað öðruvísi en gistiheimili?“ spurði Jón Viðar.
Slökkvilið hefur heimild til þess að skoða með eða án fyrirvara öll iðnaðarhúsnæði á landinu. Hins vegar hefur slökkviliðið enga heimild til þess að skoða ástand brunavarna í íbúðarhúsum. Enn fremur er staðan þannig í dag að eftirlit með reglugerðum er varða byggingar og öryggi í þeim á margar höndum. Sagði DV frá því fyrr í sumar að því eftirliti með brunavörnum og byggingamálum væri sinnt af 122 mismunandi opinberum aðilum á Íslandi. Lýstu heimildarmenn DV því þá að þeir hefðu miklar áhyggjur af því að þegar margir bera ábyrgð, ber enginn ábyrgð.
