Fyrirhuguð byggð í Skerjafirði gæti haft áhrif á flugöryggi á Reykjavíkurflugvelli. Hafa flugmenn Air Iceland Connect tilkynnt um atvik þar sem ókyrrð í lofti var rekin til nýrrar byggðar á Valsreitnum svokallaða við Hlíðarenda. Því hefur Isavia samið við Hollensku loft- og geimferðarstofnunina um að gera óháða úttekt á áhrifum fyrirhugaðrar byggðar á svæðinu á ókyrrð og vinda á Reykjavíkurflugvelli, sem hluta af flugöryggi svæðisins. Morgunblaðið greinir frá.

Haft er eftir Sigrúnu Jakobsdóttur, framkvæmdastjóra flugvallasviðs Isavia, að mikilvægt sé að allar upplýsingar liggi fyrir svo öruggt sé að fyrirhuguð byggð muni ekki hafa áhrif á flugöryggi svæðisins í framtíðinni, en engin slík úttekt var gerð áður en byggt var upp hverfið á Valsreitnum og því þótti það rétt að gera slíkt nú:

„Þetta hefur allt áhrif, sérstaklega þegar byggð er komin svona nálægt flugvöllum,“

segir Sigrún en byggðin í Skerjafirði er sögð geta haft áhrif á ákvörðun flugfélaga um hvernig flogið sé við ákveðnar aðstæður og þar á meðal lækkað notkunarstuðul Reykjavíkurflugvallar.

Mun niðurstaðan liggja fyrir í í byrjun júlí.

Fyrirhugað er að 1.200 íbúða byggð rísi á svæðinu á næstunni en óvíst er hvaða áhrif niðurstaðan úr úttekt Hollensku loft – og geimferðarstofnuninni mun hafa á þær fyrirætlanir, reynist byggðin ógna flugöryggi á svæðinu.

Sjá nánar: Svona gæti nýtt hverfi í Skerjafirði litið út – Úthlutunaráætlun samþykkt