Elliðavatn opnaði í gærmorgun, Sumardaginn fyrsta, og veiðimenn á öllu aldri lögðu leið sína til veiða. Veðurfarið var ágæt en hefði kannski mátt vera aðeins hlýrra og veiðimenn röðuðu sér með góðu millibili við veiðiskapinn eins og á að gera þessa dagana.

,,Nei, ég er ekki búinn að fá neitt ennþá,“ sagði ungi veiðimaðurinn Bragi Styrmisson sem kastaði flugunni fyrir neðan Elliðaárbæinn með föður sínum Styrmi sem kenndi honum réttu handköstin. Sannalega efnilegur veiðimaður þar á ferð.

Á meðan ungi veiðimaðurinn kastaði flugunni var lítilega rætt um veiðina og sumarið fram undan. Auðvitað á veiði engin takmörk og allir geta veitt sem vilja það.  Þeir feðgar héldu áfram að veiða, fiskurinn vakti en tók ekki meðan við vorum á svæðinu.

,,Já, var þarna í morgun og veiðimenn voru að fá fiska, einn og einn vænan,“ sagði Ingimundur Bergsson hjá Veiðikortinu sem fylgist vel með vötnunum þessa dagana. Enda vilja allir veiða og eiga Veiðikortið þessa dagana.

,,Við erum búnir að fá tvo, mættu vera stærri,“ sagði veiðimaður sem var að ganga frá veiðidótinu og var hættur. Hann ætlaði að reyna aftur þegar hlýnaði aðeins.

En margir voru að veiða á öllum veiðistöðum við opnun Elliðavatns, gaman að sjá unga veiðimenn í fullum skrúða, með brennandi áhuga á veiðinni. Duglegir að kasta flugunni og fá réttu leiðsögnina.

Mynd. Bragi Styrmisson  kastar flugunni við Elliðavatn á opnunardaginn í gær. Mynd. María Gunnardóttir.