„Ef eitthvert eitt orð getur lýst ástandinu á heimsbyggðinni um þessar mundir er það orðið óvissa. Enginn veit hvað framundan er. Enginn veit hvað við tekur“,

segir Styrmir Gunnarsson, fyrrverandi ritstjóri Morgunblaðsins um Covid-19 faraldurinn.

Margir hafa sett sig í heimspekilegar stellingar um áhrif veirunnar á samfélagið, en Styrmir segir það ljóst að ekkert verður sem áður og að veiran geti vonandi reynst blessun í dulargervi:

„En eitt er þó víst. Samfélög manna verða ekki söm og áður. Það er líklegra en hitt að gildismat okkar breytist og að þau samfélög ofurneyzlu, sem orðið hafa til, ekki sízt á Vesturlöndum, muni smátt og smátt hverfa eða a.m.k. láta undan síga. Það er út af fyrir sig jákvætt. Og getur m.a. hjálpað okkur vegna loftslagsbreytinga. Kannski þurfti mannfólkið að verða fyrir svona áfalli til þess að ná áttum.“

Styrmir segir sögu ofurneyslu á vesturlöndum ljóta, meðan fjölmennir hópar þjáist af fátækt og spyr hvort hugsanlega muni kórónuveiran opna augu almennings fyrir þeirri staðreynd.