Í gegnum tíðina hafa margir velt því fyrir sér hvernig er að deyja og hvort eitthvað taki við að þessari jarðvist okkar lokinni. Skoðanir eru skiptar um þetta og kannski erfitt að skera úr um þetta á óyggjandi hátt. Vísindamenn við Western University og háskólann í Liege í Belgíu rannsökuðu þetta með aðstoð gervigreindar.

Samkvæmt frétt Sunday Express þá komust vísindamennirnir að þeirri niðurstöðu að flestir, sem eru nálægt því að deyja en deyja ekki, upplifi jákvæða tilfinningu í tengslum við þessa lífsreynslu. Fólkið telur sig hafa upplifað „líf eftir dauðann“. Í þessum upplifunum getur til dæmis falist að fólk sér persónu sem er tengd trú eða það upplifir tilfinningu eins og það yfirgefi líkama sinn.

Eftir reynslu af þessu tagi dregur almennt úr ótta fólks við dauðann og það hefur minni áhuga en áður á efnislegum gæðum. Þetta sama fólk hefur einnig minni þörf en áður fyrir að keppa við aðra í hinu daglega lífi og hefur minni áhuga á samfélagsstöðu sinni.

Í rannsókninni voru farnar nýjar leiðir við rannsókn á þessu efni. Gervigreindin greindi 158 texta, sem fólk sem hafði lent í því að vera við dauðans dyr, hafði skrifað. Greint var hvaða orð fólkið notaði, til dæmis „ljós“ (sem var notað í 67% tilfella) og „gott“ (sem var notað í 65% tilfella).

Í tilkynningu frá Western University segir að niðurstaðan bendi til að fólk upplifi það ekki sem neikvætt að hafa verið við dauðans dyr.

Sumir vísindamenn telja að sýnir um líf eftir dauðann séu eðlilegt fyrirbæri og ekki endilega sönnun þess að líf sé eftir dauðann.

Sam Parnia, yfirmaður bráðamóttöku- og endurlífgunardeildar LNYOU Langone School of Medicine í New York, sagði nýlega í Oz Talk að fólk lýsi oft tilfinningu um birtu, hlýju og ljós sem býður það velkomið og laðar til sín. Sumir lýsi því að þeir hafi fundið fyrir látnum ættingjum, nánast eins og þeir hafi komið til að bjóða fólkið velkomið.

„Oft segir fólk að það hafi ekki viljað koma til baka, þetta hafi verið svo þægilegt og þetta hafi verið eins og segull sem dró það til sín. Margir lýsa tilfinningu um að þeir hafi sagt skilið við líkamann og horft á lækna og hjúkrunarfræðinga vinna við líkamann.“

Hann sagði að vísindalegar skýringar væru á þessum viðbrögðum og að sýnir sem þessar sanni ekki að líf sé eftir dauðan. Líklegra sé að heilinn sé einfaldlega að fara í gegnum allt sem í honum er í leit að leið til að bjarga sér frá dauða.