Tólf manna kviðdómur í bænum Morwell í Viktoríufylki sakfelldi Erin í júlímánuði og hefur endanleg refsing loks verið kveðin uppp. Þarf hún að sitja inni næstu 33 árin hið minnsta en þá á hún möguleika á reynslulausn.
Réttarhöld í málinu vöktu gríðarlega athygli en málið komst í fréttirnar sumarið 2023.
Þá bauð Patterson tengdaforeldrum sínum og vinum í mat og bauð upp á girnilega Wellington-nautalund. Svo fór hins vegar að tengdaforeldrarnir og annar gestur, systir tengdamömmunnar, dóu í kjölfar matarboðsins og annar gestur, maki systurinnar, veiktist alvarlega.
Í ljós kom að baneitraðir sveppir hefðu verið notaðir í matargerðina en Patterson hélt því staðfastlega fram að hún hefði fengið sveppina fyrir mistök á markaði og ekki haft hugmynd um hættuna sem stafaði af þeim.
Ýmislegt kom þó í ljós við réttarhöldin, til að mynda borðaði Erin sjálf af disk í öðrum lit í matarboðinu og þá hafði hún rannsakað eitraða sveppi á netinu.
Þá hafði eiginmaður hennar fyrrverandi, sem boðaði forföll í matarboðið, ítrekað sakað hana um að hafa reynt að eitra fyrir sér þegar hjónaband þeirra var að fara í vaskinn. Börn þeirra voru einnig viðstödd matarboðið en fengu annað að borða en nautalundina eitruðu.
Ýmislegt sem Erin hafði líka haldið fram reyndist vera lygi. Hún hafði sagt að nýlega greint krabbamein hefði orðið til þess að hún blés til matarboðsins en það var fjarri sannleikanum. Þá reyndi hún að leika það að hún hefði einnig orðið fyrir eitrun af völdum sveppanna, sem reyndist ekki rétt.
Christoper Beale, dómari í málinu, var ómyrkur í máli þegar hann tilkynnti hvaða refsingu Erin fengi.
„Fórnarlömb þín voru öll skyldmenni þín í gegnum hjúskap. Enn fremur höfðu þau öll verið góð við þig og börnin þín í mörg ár eins og kom fram í vitnisburði þínum. Þú tókst ekki bara þrjú mannslíf og ollir varanlegum skaða á því fjórða heldur ollir þú ómælanlegum þjáningum fyrir þín eigin börn.“
