Fréttir bárust af því í gær að Bíó Paradís myndi loka dyrum sínum í vor vegna hækkunar á leigu. Þessar fréttir sköpuðu mikla reiði hjá menningarunnendum landsins þar sem Bíó Paradís hefur skipað sér veigamikinn sess í menningarlífi miðborgarinnar.

Sveinbjörn Thorarensen, betur þekktur sem Hermigervill, tjáði sig um lokunina í gær á Twitter og vakti athygli á því að hann hefur lent í svipuðu máli. „Í ljósi atburða dagsins minni ég á það að eftir að leigan á studiorýminu hjá okkur Loga Pedro og fleirum var hækkuð um 100% og við fórum út hefur rýmið staðið autt síðan – Í. Fjögur. Ár.“ Rýmið sem um ræðir er ennþá auglýst til leigu á fasteignasölunni Tröð en mynd af því má sjá hér fyrir neðan.

Gunnar Smári Egilsson, fjölmiðlamaður og sósíalistaforingi, deilir tísti Hermigervils og segir þetta vera „hagræði heimskunnar“. Gunnar er með kenningu um ástæðuna fyrir því að „Gamma-drengirnir“ séu að koma Bíó Paradís út úr húsnæðinu.„Gamma-drengirnir sem eru að hrekja BíóParadís út reikna ekki með að fá neinn til að leigja húsnæðið á rúmlega tvöföldu verði,“ segir Gunnar og bendir á að nóg sé af tómu húsnæði í miðbænum.

„Þetta gengur út að hækka áætlað leiguverð svo hægt sé að taka hærri lán út á eignina eða selja hana á hærra verði. Og þá skiptir engu hvort einhver vill leigja, bankinn spyr ekki um það (eins og sést á miklu magni af tómu verslunar- og skrifstofurými í miðbænum, sem lækkar ekkert þrátt fyrir enga eftirspurn). Ef Gamma-drengirnir eiga í erfiðleikum með að borga lánin þá safnar bankinn vanskilum saman, bætir ofan á höfuðstólinn á láninu sem þeir fengu vegna hækkunar leigunnar (þótt enginn vildi leigja) og lánar nýju fyrirtæki Gamma-strákanna, sem kaupir húsið á hærra verði.“

„Þetta er náttúrlega grátlegt“