Mikil óvissa ríkir um framtíð Bíó Paradísar en starfsfólki kvikmyndahússins hefur öllu verið sagt upp. Til stendur að skella í lás þann 1. maí og er framtíð rekstursins óljós að svo stöddu. Talið er að óvissan snúist um framtíð húsnæðisins, en það er í eigu félagsins Karls Mikla ehf.

Bíó Paradís opnaði á Hverfisgötu haustið 2010 og tók þá við af Regnboganum. Bíóið hefur skipað sér sérstöðu með því að sýna kvikmyndir frá öllum heimshornum, auk hverskyns eldri mynda. Þá hýsir bíóið kvikmyndahátíðir og stendur fyrir fjölbreyttum kvikmyndatengdum viðburðum, enda er bíóinu lýst sem samstarfsvettvangi flestra þeirra sem koma að kvikmyndamálum í landinu.

Bíó Paradís hefur undanfarin ár verið samstarfsvettvangur flestra þeirra sem koma að kvikmyndamálum í landinu. Má þar nefna dreifingaraðila kvikmynda (Senu, Græna ljósið, Myndform, Samfilm); Stockfish Kvikmyndahátíð í Reykjavík, Alþjóðlega kvikmyndahátíð í Reykjavík, Reykjavik Shorts & Docs, Stuttmyndadaga í Reykjavík; Kvikmyndamiðstöð Íslands og Kvikmyndaskóla Íslands. Auk þess á bíóið samstarf við ýmis konar aðra aðila um sýningarhald og aðra kvikmyndatengda viðburði í húsinu.

Framundan er stjórnarfundur hjá stofnaðilum Heimilis kvikmyndanna ses, sjálfseignarstofnunarinnar sem rekur Bíó Paradís, og verður þar staða bíósins og framtíð tekin til umræðu.